文化研究

究竟今年C3點解咁早有人排?

究竟今年C3點解咁早有人排?我哋嘅特派記者今日就去現場訪問咗幾個排隊人士,睇下佢哋點講

1. 咩嘢驅使你早三日就係度紮營?
「係愛啊哈利!」從排隊人士堅定嘅答覆,就知道佢真係好有愛。
而且唔止係對某一表演者嘅愛,仲係對C3嘅愛。據其中一位受訪嘅排隊人士稱,年年頭幾位都會見到佢哋幾個係度, 可見幾位好博愛亦都好愛C3。

但係黎得排隊,點都有啲目標嘅,其中兩位就話今年特別會留意[email protected],會博吓有冇直簽,同埋留意吓參展商會唔會有開場前突擊發佈嘅消息。
另一位排隊人士都話目標係排簽名籌,原本都有目標,但係到訪問嘅一刻參展商都仲未公佈詳情,所以都擔心會失預算。而且咁辛苦排返黎嘅簽名就梗係要黎自己收藏,唔會放返出去。
其中一位排隊人士話聽過有人係為咗會場優先嘅figure 而排隊,然後再賣返出去,但係佢表示一定唔會咁做,更指:「我上網都訂到,做咩要早你幾個月姐」。被問到排咗幾多年嘅時候,更坦言:「有興趣就會排,冇興趣就你比錢我都唔排」。

2. 有咩策略確保一定買到心頭好?
排隊人士就表示,其實佢哋排到依個位,要買上述嘅心頭好都已經十拿九穩,因為依一個參展商見到排頭幾位嘅人士,只要舉手表示係去買佢嘅商品,就會直接帶佢哋去另一條隊入場購買。
編輯覺得依個安排幾貼心,唔洗怕排咗幾日隊,但係就畀社入黨同記者黨偷偷買哂啲限定goods。

3.有幾多人合作一齊搖曳露營?有冇排隊策略?
排隊人士表示,年年都會落雨,往年都係要靠紙皮、膠袋去遮風擋雨,所以今年就做足準備,帶定營黎排隊。
亦有排隊人士指,嚟得排隊嘅其實大家都識,主要都係一齊排嘅人都會互相照應,例如行開會幫手睇住啲。大家亦有共識唔會換人排隊。
編輯心諗有個團結嘅動漫fans圈真係好……

4.係會展門口嘅元宵節過成點?
幾位排隊人士一致表示元宵節依啲現充節日,你唔講我都唔知,「依啲野關我哋咩事,係會展門口不知幾好訓!」,其中一位排隊人士更加話:「如果我知道尋晚係元宵節,我就唔會出黎排添呀!不如留喺屋企打機好過啦,老虎蟹都唔會蒲頭呀!」
幾位排隊人士嘅回答編輯覺得係滿分嘅model answer,好心啲偽毒就學下野。

ACG Secrets.HK
ACG Secrets.HK由一群來自香港的ACG文化愛好者組成,目的透過發佈相關的新聞與評論,推廣本地ACG文化。